सोमबार, ०७ जेठ २०८१

बाजुराकै सर्वाधिक विकट हिमालीको गुम्बागाउँमा आधारभुत स्वास्थ्य सेवा केन्द्र सञ्चालन

बाजुरा : बाजुराकै सर्वाधिक विकट गुम्बा गाउँमा गाउँपालिकाले आधारभुत स्वास्थ्य सेवा केन्द्र सञ्चालनमा ल्याएको छ । गुम्बा गाउँका स्थानीयलाई स्वास्थ्य सेवा उपलब्ध गराउने लक्ष्य सहीत सेवा केन्द्र सञ्चालन गरेको हो । 

स्थानीयलाई हालसम्म आधारभुत स्वास्थ्य उपचार सेवाका लागि पनि चार देखि ५ घण्टाको पैदल दुरि हिँडेर मात्रै अर्को गाउँमा पुगेर स्वास्थ्य सेवा लिनु पर्ने बाध्यता थियो । आधारभुत स्वास्थ्य सेवा केन्द्र सञ्चालनसँगै गुम्बा बासीलाई केही राहत हुने भएको छ । 

हिमाली गाउँपालिकासँग संघिय संरचना पछि २ वटा रुगिन र बिच्छ्या स्वास्थ्य चौकी मात्रै थिए । ६ वर्षको अवधीमा हाल ११ वटा स्वास्थ्य संस्था थपेर १३ वटा पुगेको गाउँपालिकाका प्रमुख प्रशासकीय अधिकृत राजबहादुर भण्डारीले बताएका छन् । 

एकगाउँबाट अर्को गाउँ पुग्नै आधा दिन लाग्ने, भौगोलिक विकटता र सडक बाटो नै नभएकोले गाउँ पिच्छ्य नै स्वास्थ्य संस्था आवश्यक परेको पालिकाले बताएको छ । आधारभुत स्वास्थ्य सेवाका लागि पनि स्वास्थ्य सेवा केन्द्र सञ्चालनमा ल्याउनु परेको प्रशासकीय अधिकृत राजबहादुर भण्डारीले बताएका छन् ।

हिमाली गाउँपालिका २ मा पर्ने गूम्बा गाउँमा सिंगो जनजाति बस्ती मात्रै बसोबास गर्ने गरेको छ । पशुपालन र जडीबुटी खेतीबाटै उनीहरुले जीवन निर्वाह गर्ने गरेका छन् । २५ बढीको परिवार संख्यामा बसोबास रहेको गाउँका केही भेडा सहीत हिउँदमा बेशी झरेपछि बालबालिका र वृद्धवृद्धा गाउँमै बस्ने गरेका छन् ।

हिउँदका चार महिनासम्म अत्याधिक चिसो हुने र हिउँले एक गाउँबाट अर्कोगाउँमा जान समेत समस्या हुनेगरेको छ । आधारभुत सेवा सञ्चालनसँगै महिला बालबालिकाका लागि सहज हुने गाउँपालिका उपाध्यक्ष राजकला सार्कीले बताएकी छन् ।

गाउँमा आधारभुत स्वास्थ्य केन्द्र सञ्चालनसँगै औषधी सहीत स्वास्थ्य कर्मी समेत पठाइएको गाउँपालिकाले बताएको छ । १ जना अनमी, १ जना अहेब र १ जना कार्यालय सहयोगीले काम गर्ने गरि कर्मचारी व्यवस्थापन गरिएको छ ।

मतदानका लागि समेत बास बस्नु पर्ने र सामान्य उपचारका लागि समेत बास बस्नु पर्ने बाध्यता आधारभुत स्वास्थ्य सेवा केन्द्र सञ्चालनसँगै हटेकोमा स्थानीय खुसी भएका छन् । लामो प्रयास पछि गाउँपालिका सफल भएको अध्यक्ष गोविन्द्र मल्लले बताएका छन् । 

गाउँमै सुरक्षित प्रसुती सेवा पनि सञ्चालन हुने भएको छ । हालसम्म गाउँका अधिकांशले घरमै बच्चा जन्माउनु पर्ने बाध्यता थियो । हिमाली बाजुरा जिल्लाकै सर्वाधिक विकट र भौगोलिक रुपमा दुर्गम पालिका हो । भने बिच्छ्या क्षेत्रको गुम्बा गाउँ झनै सर्वाधिक विकट मानिन्छ । 

प्रतिक्रिया दिनुहोस