काठमाडौं : नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आज शनिबार ‘बासँग विद्यार्थी’ कार्यक्रमलाई सम्बोधन गर्ने भएका छन् ।
उनले विद्यार्थीहरुको समूह एड टक्सले गर्न लागेको ‘बासँग विद्यार्थी’ कार्यक्रमलाई सम्बोधन गर्न लागेका हुन् । ‘आज म ‘बासँग विद्यार्थी’ भन्ने कार्यक्रममा हुनेछु । कार्यक्रम इम्पेरियल बेङ्क्वेट सल्लाघारी भक्तपुरमा बिहान ११ः४५ मा हुने रहेछ । कार्यक्रमको मोडरेटर चाहिँ भिडियोमा देखिएकी यी नातिनीले गर्नेछिन् ।’ सामाजिक सञ्जाल फेसबुकमा एक भिडिओ क्लिप सेयर गर्दै अध्यक्ष ओलीले भनेका छन् ।
संविधानसभा अध्यक्ष तथा नेकपा एमालेका उपाध्यक्ष सुवास नेम्वाङको निधनका कारण शोकमा रहेका अध्यक्ष केपी शर्मा ओली शनिवार बालबालिकासँग छलफलका लागि सार्वजनिक कार्यक्रममा निस्कदैँछन् ।
यसअघि भदौ २८ गते बुबाको मुख हेर्ने दिन पारेर पूर्व निर्धारित ‘बा सँग बालबालिका’ कार्यक्रम नेम्वाङको असामयिक निधनका कारण रोकिएको थियो । सोही कार्यक्रम आज भक्तपुरस्थित इम्पेरियल पार्टी प्यालेसमा हुन लागेको हो ।
नेम्वाङको निधनका कारण बाको मुख हेर्ने दिन शोकमा रहेका ओलीसँग भेट गर्न नपाएकी आयोजकमध्येकी एक बालिका स्वीकृति शर्मा शुक्रबार बालकोट पुगेर ‘केपी बा’को मुख हेरिन् । उनी कांग्रेस महामन्त्री विश्वप्रकाश शर्माकी छोरी हुन् ।
स्वीकृतिले ओलीलाई आफूले लगेका परिकारहरु समेत चखाएकी थिइन् । त्यस क्रममा बा र छोरीले केहीबेर रमाइलो क्षण बिताएको ओलीको सचिवालयले जनाएको छ । स्वीकृतिले केपी बासँगका आफ्ना फोटो तथा भिडिओहरु टिकटकमा राखेकी छन् ।
ओलीलाई बा भन्ने स्वीकृति नै आजको कार्यक्रमको मोडरेटर हुन् । उनलाई केपी ओलीले पनि छोरीको दर्जा दिएर माया गर्ने गरेका छन् । स्वीकृतिकै कारण ओली र विश्व प्रकाशको सम्बन्ध राजनीतिक रुपमा प्रतिस्पर्धी भए पनि सामाजिक रुपमा पारिवारिक र भावनात्मक बनाएको छ ।
नेकपा एमालेका अध्यक्ष केपी शर्मा ओलीलाई पार्टी कार्यकर्ताहरुले ‘बा’ को सम्बोधन गर्छन् । अब विस्तारै यही नामले उनी पार्टीबाहिर पनि ब्रान्डिङ हुन थालेका छन् । यस्तै कार्यक्रम हो ‘बासँग बालबालिका’ ।
‘एड टक्स’ नामक संगठनका तर्फबाट यो कार्यक्रम आयोजना गरिएको स्वीकृतिले बताएकी छन् । एड टक्सले जनाएअनुसार ‘बासँग विद्यार्थी’ नाममा कार्यक्रम आयोजनाको निम्तो ओलीलाई एक महिना अघि नै दिइएको थियो ।
प्रतिक्रिया दिनुहोस