बाजुरा : नेकपा एमाले बाजुराले पार्टीको ११ औं महाधिवेशनका लागि सर्वसम्मत प्रतिनिधी छनोट गरेको छ । मंसिर २७ देखि २९ गतेसम्म काठमाडौंमा हुने एमालेको ११ औं महाधिवेशनका लागि बाजुराबाट सर्वसम्मत प्रतिनिधी छनोट भएका हुन् ।
खुला, महिला, दलित र युवा कोटा गरी १६ जना प्रतिनिधी सर्वसम्मत छानिएको प्रतिनिधी छनोट निर्वाचन समिति संयोजक मदनराज जैशीले बताएका छन् । पार्टी भित्रको एकताको सन्देश प्रतिनिधिहरू सर्वसम्मतरूपमा चयन गरिएको पार्टी जिल्ला अध्यक्ष लालबहादुर ओलीले बताएका छन् ।
प्रतिनिधी हुनेमा खुला तर्फ ७ जना छानिएका छन् । जसमा लालबहादुर ओली, जनक कुमार बोहरा, बल्देव रेग्मी, गगन रावल भरत थापा, मनलाल विष्ट, मेघराज शाही छन् । भने महिला ४ जनामा सीता थापा, देवु खाती, पार्वती थापा विष्ट र बसन्ती गुरुङ छानिएका हुन् ।
दलित तर्फको ४ जनाको कोटामा काशी विक, गौरी सार्की, अमर विक र राजकला सार्की छानिएका छन् । ४० वर्ष मुनिको युवा कोटा नरेश रोकाया सर्वसम्मत बनेका छन् । रोकाया अनेरास्ववियुको अध्यक्ष हुन उमेर हदका कारण रोकिएका थिए ।
बाजुराबाट १० औं महाधिवेशनका लागि पनि प्रतिनिधी सर्वसम्मत छानिएका थिए । भने नवौं का लागि चुनाव गरिएको थियो । जिल्लामा पार्टीभित्र देखिएको समन्वय, सहकार्य र आपसी विश्वासका कारण यसपालिको चयन प्रक्रिया सहज र विवादरहित बनेको एमाले नेताहरूले बताएका छन् ।
प्रतिनिधि छनोटपछि एमाले नेताहरूले सर्वसम्मत निर्णयले संगठनभित्र ‘एकता, त्याग र हार्दिकता’ झनै मजबुत भएको टिप्पणी गरेका छन् । एमाले बाजुरा अध्यक्ष लालबहादुर ओलीका अनुसार, “सर्वसम्मत चयनले बाजुरा एमाले अझै बलियो, संगठित र लक्ष्यकेन्द्रित रूपमा अघि बढ्ने संकेत दिएको छ ।”
पार्टीले सर्वसम्मत चयनलाई आगामी राजनीतिक गतिविधिहरूमा सकारात्मक प्रभाव पार्ने विश्वास व्यक्त गरेको छ । बाजुरामा पार्टी केन्द्रमा देखिएको ओली र विद्या समूहको प्रभाव पर्ने आँकलन गरिएको थियो । विद्या पक्षबाट ईश्वर पोखरेल अध्यक्ष उठ्ने भएपछि एमाले स्थायी कमिटी सदस्य कर्णबहादुर थापा त्यसैको लवीमा छन् । र आफूपनि पदाधिकारीमा उम्मेदवार रहने संकेत गरिसकेका छन् ।
तर बाजुरा जिल्ला कमिटीले सर्वसम्मत प्रतिनिधी छनोट गरेर बलियो एकता, हार्दिकता र नेता र नेतृत्व प्रतिको सम्मान देखाएको पार्टी उपाध्यक्ष जनक कुमार बोहराले बताएका छन् ।
बाजुरा बाट कर्णबहादुर थापा स्थायी कमिटी, लालबहादुर थापा, सहदेव बोगटी, दयालबहादुर शाही केन्द्रीय सदस्य छन् । भने बसुन्धरा रोकाया आयोग सदस्य हुन् । बाजुराकै कालीबहादुर शाही प्रदेश कमिटी उपाध्यक्ष छन् । उनी प्रदेश कमिटीबाट प्रतिनिधी छानिने छन् ।
प्रतिक्रिया दिनुहोस