धनगढी : नेकपा एमालेका स्थायी कमिटी सदस्य तथा गण्डकी प्रदेशका पूर्व मुख्यमन्त्री खगराज अधिकारीले केपी ओली नै आगामी पार्टी अध्यक्ष हुने दाबी गरेका छन् ।
प्रेस चौतारी नेपाल कैलाली जिल्ला समितिले कैलालीको धनगढीमा आयोजना गरेको पत्रकार सम्मेलनमा उनले विधान महाधिवेशनको भावलाई समेट्दै ओली नै अध्यक्ष बन्ने दाबी गरेका हुन् ।
सर्वसम्मतको अन्तिम प्रयत्न जारी रहने नभए स्वच्छ प्रतिस्पर्धाबाट भएपनि नेतृत्व चयन हुने उनको दाबी थियो । । ‘आगामी महाधिवेशनबाट वर्तमान नेतृत्वलाई सर्वसम्मत अध्यक्ष बनाउने हो, सर्वसम्मतको अन्तिम प्रयास रहन्छ भएन भने स्वच्छ प्रतिस्पर्धामा हुन्छ’ उनले भने ।
उने नेताहरूको सम्पत्ति छानबिन हुने विषयलाई पनि स्वीकार गरेका थिए ।
‘सम्पत्ति छानबिन हुनुपर्छ । हामीबाटै छानबिन सुरु गर्दा हुन्छ ’ उनले भनेका थिए, ‘अहिले गरेपनि हुन्छ उच्चस्तरीय सम्पत्ति छानबिन समिति गठन गर्दा पनि हुन्छ । ’
जेनजीको नाममा भएको तोडफोड हिंसाको निष्पक्ष छानबिन हुनुपर्ने उनको माग थियो । मुलुक अहिले असंवैधानिक ढङ्गले अघि बढिरहेको उनले आरोप लगाए । अहिलेको अवस्थामा निर्वाचन सम्भव नभएको भन्दै उनले वर्तमान सरकारले निर्वाचन गराउन नसक्ने जोड दिएका थिए ।
‘यो सरकारले चुनाव गराउँदैन । चुनाव गराउन आएको पनि होइन । युवाहरूको मागलाई हाई ज्याक गरेर मूलकलाई भुटानीकरण वा सिक्किमीकरण गर्न आएको हो ’ अधिकारीको आरोप थियो ।
देशलाई निकास दिनु एमालेको दाइत्व रहेको उल्लेख गर्दै उनले अहिलेको अवश्यक्ता संसद् पुनर्स्थापना रहेको बताए । संसद्को पुनर्स्थापना मार्फत संविधान संशोधन गरेर समस्याको समाधान गर्न सकिने उनले बताए । अहिलेकै अवस्थामा निर्वाचन सम्भव नभएको उनको दाबी थियो ।
‘प्रहरीको उच्च अधिकारीको पोसाक जेलबाट भागेका अपराधीहरूसँग छ । हतियार पनि उनीहरूसँग छ । निर्वाचनको दिन उनीहरू ती पोसाक र हतियारसहित आए भने पुलिस हुन् कि अपराधी कसरी थाहा हुन्छ ’ उनले भने, ‘पहिले सरकारले सुरक्षा प्रत्याभूति दिलाउनुपर्छ अहिले दिलाउन सकिरहेको छैन । ’
अहिले एमालेले सुरु गरेको वडा, पालिका तथा जिल्लास्तरको प्रदर्शनले मुलुकभर एमालेको जनलहर रहेको प्रस्ट भएको उनले बताए । एमाले राष्ट्रवादी शक्ति भएको भन्दै देशी विदेशी शक्ति अहिले एमालेविरुद्ध खनिएको उनले बताए । नेकपामा भीम रावलको प्रवेशलाई उनले कटाक्ष गरेका थिए ।
‘भीम रावलबाट हिजो पनि सहयोग भएको थिएन । बहिर्गमन भएकोमा हर्षबढाइँ भएको छैन तर, ताक परेको बेलामा ज्ञानेन्द्र शाहीसँग हात मिलाउने नत्र प्रचण्ड ठिक भन्ने कुरा ठिक होइन ’ उनले भने । प्रेस चौतारी कैलालीका अध्यक्ष जनक विष्टको अध्यक्षतामा कार्यक्रम आयोजना गरिएको हो ।
प्रतिक्रिया दिनुहोस